O maota o Tala’i ma Si’uta’ufogapapa ile afioaga o Saleapaga, o le sulufaiga e maua ai le filemu ma le saogalemu o tina ma tamaitai o le nuu mai sauaga.
O le ‘au’au lea o le mafutaga faalea’oa’oga ile afioaga o Saleapaga, a le faalapotopotoga o le toomaga mo e puapuagatia o loo galulue ma le Malo ise taumafaiga e taofia ai le sauaina o tina ma tamaitai.
Ua faailoa le manulauti o igoa o ia maota e lua o le nuu, ua lagolago ai ile polokalame a le toomaga, ae ua taulamua ai tamalii ma failauga o Saleapaga e saili ni auala e fausia ai se ta’iala e taofia ai sauaga o loo aafia ai le ola ma le soifua o tina ma tamaitai o le latou nuu.
I se pepa o faamatalaga mai le Toomaga ua faailoa ai e le Pelesetene o le faalapotopotoga le faletua o Siliniu Lina Chang, lona faafetaia o le mafutaga a alii ma faipule o Saleapaga ua mafai ona fausia ai se fatu e faavae ile alofa, e tausia ai le filemu ma puipuia malu ai le saogalemu o tina ma tamaitai mai le afea ini sauaga e le manaomia.
