A’o tapena le tatou aulakapi o le Manu Samoa i le isi ana taaloga o le taamilosaga o le Ipu o le Pasefika i le faaiuga o le vaiaso nei, ina ua manumalo i lana taaloga muamua ma le au a Ausetalia A, o lea ua faailoa faalauaitele mai le faiga paaga a le Pulega o Tagata Tafafao Maimoa mai i Samoa, ma le tatou aulakapi.
O le lagolago a le pulega o tagata tafafao ua faalauiloa ai le manulauti o faatosina mo tulisi o le Beautiful Samoa i le laei poo le jersey taalo o le Manu Samoa, faapea ma upu faalauiloa o le toe tatalaina o tuaoi faavaomalo o Samoa i le masina fou o Aukuso.
Ua faailoa i se pepa o faamatalaga e le Ofisa Sili o le pulega o le Lakapi Samoa le susuga Faleomavaega Vincent Fepulea’i le tāua o le faiga paaga ona e tāua tele le faalauiloaina o le tatou atunuu e ala lea i le Manu Samoa, ona e tāua i le atiina’e o tagata tafafao poo tulisi mai fafo.
