O le asō, Aso Tofi, 24 o Aokuso ua faaulu atu ai suafa o sui faatutū mo faigāpalota laiti a itumalo o Vaa o Fonoti, Siumu, ma Faleata 4.
Ua faailoa e le Komesina o faigāpalota le afioga Tuiafelolo A John Stanley o le Aso Faraile o le vaiaso nei 25 o Aokuso e faamuta ai le faauluina o suafa o sui faatutū, peitai o le toe faauiina i tua o se suafa o le filifiliga o se sui poo ni sui faatutū o le a faamuta i le Aso Tofi o le vaiaso asau le aso 30 o Aokuso.
E toaono sui ua mae’a ona faalauiloa i lipoti i ni vaiaso ua tuanai o le a taufetuli mo le toe sailia o ni sui usufono o ia itumalo faapalota, e toatolu mo le vaega faaupufai o le Faatuatua i le Atua Samoa ua tasi, toalua mo le vaega e puipuia aiātatau a tagata ma le sui o le a tauva faatutoatasi.
Ua faailoa e le ofisa o le komisi o faigāpalota o le aso 13 o le masina fou o Setema o le palota muamua le pre-polling, ae Aso Faraile 15 o Setema o palota laiti mo itumalo e tolu e pei ona avanoa nei o latou nofoa i le Palemene.
O le Aso Gafua 18 o Setema ua atofaina o le a toe faafoi ai le faasalalauga o ia faigāpalota laiti, ma o le aso foi lea o le a faailoa ai i se tulaga aloaia ma sui tauva ua faamaonia le manumalo ma avea ma tofi faipule o Vaa o Fonoti, Faleata 4 ma Siumu.
