Ua molimauina nei ua le ‘asa se faigamalaga mai fafo ma pasese e maua i le faama’i Koviti-19 talu ona le toe faanofoesea tagata malaga i nofoaga sa faatino ai lea auala o puipuiga.
O le lipoti lata mai a le soifua maloloina o le lua aso ua tuanai mai le aso 29 o Iuni i le aso muamua o Iulai, e to’a sefulufā tagata malaga poo pasese na ulufale mai i Samoa ma le faama’i. E 31 gasegase fou o le faama’i i totonu o lea lua aso ma o le to’a sefulufa o gasegase o pasese malaga mai fafo, ae sefulufitu o tagata lautele o le atunuu.
O le faigamalaga a le Air NZ o le aso 26 o Iuni e to’avalu tagata malaga na aafia i le siama o le faama’i, o le malaga a le Qantas o le aso 28 o Iuni e to’atasi le pasese na maua i le siama o le Koviti-19, ae o le malaga a le Fiji Airways o le aso 28 o Iuni e sefulutolu le pasese na aafia i le faama’i.
O faamaumauga lata mai o le aofaiga atoa o ē ua aafia i lo tatou atunuu e aofia ai pasese mai fafo ma le lautele o tagata ua faamauina nei i le 14,995. E leai se soifua ua fano ma tumau ai pea le aofaiga o ē ua maliliu i Samoa i le faama’i i le 29.
