Ua aveesea nei i le poloa’iga a le Faamasinoga Sili a le atunuu se taofiga faaletulafono lea e ta’ua o le caveat, mai luga o se fasi fanua umia sa’oloto, sa autū iai se talosaga na faaulu e le susuga ia Mekeli Ieremia i se taumafaiga e toe faafoi atu le fanua ia te ia, o ia foi na faatauina.
O lana finauga o ia o loo lesitala ai le fanua faatasi ma ona mātua ua maliliu ma o loo teu ai i le fanua.
Peitai ua teena lea talosaga e le faamasinoga ina ua mae’a ona su’esu’e molimau sa tuuina atu, ma ua faamautū ai le umia o lea aseta tau eleele e le tinā sa nonofo ma le uso o Mekeli, o ia lea ua talitonu le faamasinoga i lana faai’uga, sa pito telē lona sao i le totogiina o se aitalafu poo se nonogatupe sa faia i le faletupe o le ANZ i Apia.
O le mafuaaga lea o le tagi na ave i le faamasinoga ona ua tuua’ia le tinā o Lupe e lē na faauluina le mataupu i le faia o se gaioiga faatogafiti e solitulafono poo le fraud e fesoota’i i le suia o le tagata e ana le meatotino poo le fanua e pei ona lesitala ai lea meatotino i le suafa o lea tinā o Lupe.
O faamaumauga a le faamasinoga i mau sa lagolago ai le talosaga e faapea, o lē na tagi o Mekeli Ieremia, e faamautū pe nofo i Amerika, ae o le tausaga e 1986 na ia faatauina ai le fanua ma fausia ai se fale sa nonofo ai ona mātua.
O le fanua foi lea o loo lagomau ai ona tuaa o le tasi na maliu i le tausaga e 2001 ae o le isi o le 2003.
Na foi o ia i Amerika o loo nofomau ai peitai o se vaitaimi o le tausaga e 2000 na faasala ai i le falepuipui i lea atunuu ona o se solitulafono sa aafia ai.
A o nofosala ai i le falepuipui na faia e Mekeli se feuiuia’iga tau tulafono e ta’ua o le Power of Attorney ma tuu atu ai lana ioega e tusa ma ala o le tulafono e vaai e lona uso i Samoa o Luaiva ma lona to’alua o Lupe le fanua.
O lea feuiuia’iga na avanoa ai ona tuu suafa o Luaiva ma Lupe i le fanua.
O lea foi feuiuia’iga na avanoa ai ona togitogi e Luaiva ma Lupe se aitalafu na faia i le faletupe o le ANZ na faaaogā ai se teugatupe sa i suafa o le tuaa tinā o lē ua tagi ma le afafine o Luaiva.
O se nonogatupe e tusa ma le selau afe tala e pei ona faailoa i le faai’uga a le faamasinoga.
O le aitalafu lea na toe faaopoopo mulimuli ane ai, e pei ona oo le aofa’iga i le 200 afe tala ma ona tupu, lea o loo faaalia i faamaumauga o lenei su’esu’ega o loo iai le talitonuga sa totogi ai loia a lē ua tagi a o loma lona faamasinoga na mafua ai ona nofosala i le falepuipui i Amerika.
Na faaletonu le totogiina o le aitalafu ma taumafai ai Lupe le to’alua o lona uso, e faatino se isi auala e totogi ai ma faia ai loa le refinance i le faletupe o le Pasefika a o igoa muamua o le Wespac lea ua suia nei o le Bank of the South Pacific poo le BSP.
Na imeli atu Lupe ia Mekeli ma faailoa iai le tulaga ua ia fuafua e faatino ona o le naunau e lavea’i le fanua ma meatotino e pei o le fale mai le mamulu atu ona o le nonogatupe.
E le’i mana’o iai lē ua na faauluina lenei finauga i le faamasinoga, peitai na alu alu malie iai.
O le taimi lea ua lē toe mafuta lona uso ma Lupe ua tete’a.
Peitai e tupu lea tulaga ua uma ona tuuina atu e le uso o Mekeli o Luaiva lana ioega e umia ai e Lupe sa la nonofo le fanua ina ua malaga atu i Amerika Luaiva ma nofo ai.
Na faaauau ai pea ona togitogi e Lupe le aitalafu seia oo ina o le a faatau le fanua ma le fale i se auala e faauma ai le nonogatupe.
O i na mafua ai ona oo le finauga i le faamasinoga ma aumai ai le faai’uga e pei ona poloa’iina ai lē na tagi e aveese lana taofiga mai le fanua lea e ta’ua o le caveat.
Ua lē talia ai foi i le i’uga a le faamasinoga tuua’iga o le faia o se gaioiga faatogafiti i se auala faaalatua poo le fraud sa tuua’ia ai e lē na tagi le tinā oia Lupe.
O le aveesea o le taofiga faaletulafono ua avanoa ai ona faatino nisi fuafuaga e faia i le fanua.
