Ua mae’a nei le feiloaiga a le faiaoga a le Wallabies a Ausetalia, Eddie Jones ma le autusitala ma e tumau pea lana mau o ia le tagata sa’o e taitaia le Wallabies e ui i se tulaga faamāina ua iai taumafaiga a le ‘au i le Ipu o le Lalolagi. 

Ua faaulutala i nisi tusitusiga i le aso ananafi o se aso pogisa lenei mo le lakapi a Ausetalia ae ua saunoa Jones e matuai faatoese i tagata uma i le atunuu i le mea ua tulai mai.

O le faamatalaga a le kapeteni, David Porecki e pei ona lipotia ua ia ta’ua ai e lē tele sana tala ae ua lagona lona maasiasi i tagata Ausetalia.

O finagalo faaalia o tagata i luga o upega tafailagi ua faailoa ai le lē fiafia o le toatele i le iuga o le taaloga atoa ma nisi finagalo ua agai sa’o i le alii faiaoga o Eddie Jones.