Ua lē mafai e le matagaluega o le soifua maloloina ona faailoa le mafuaaga o le fano o le ola o se pepe 14 masina le matua, lea na uma ona fai lona tuipuipui o le MMR, ae fano le ola ia Me o le tausaga nei.
Na toe fesiligia le faatonu sili o le soifua maloloina i le mataupu ma faailoa ai e le susuga Aiono Dr Alec Ekeroma, ua fautuaina e leoleo le taofi ona faailoa o soo se taunuuga o suesuega na faia i le uma ai o le ola o le pepe, ona o lea ua tuuina atu nei le mataupu i le coroner poo le pule o maliu mo se suesuega e sailia ai le mafuaaga o le maliu lilo poo le inquest.
O le mae’a o lea suesuega a le coroner o le a faailoa ai ma le mafuaaga.
Ua silia i le lua masina o tālia le taunuuga o suesuega faalotoifale a le soifua maloloina na faia i le mafuaaga o le fano o le ola o lea pepe.
O tamaiti uma sa faia tuipuipui ma le pepe ua maliu e leai se isi na iai ni aafiaga o lona uiga na manuia uma, e aofia ai ma le uso masaga o le pepe ua fano le ola.
