Taua e Faimalōmatumua Mathew Lemisio i le Radio Samoa i le aoauli nei, o loo mulimuli pea le faatinoga o le galuega a le Ofisa o le Komesina o Faigapalota i faiga faavae a le atunuu ua maea ona talanoaina ma pasia.

E pei o le mataupu o loo gugulu ai nei le atunuu i le faaopopo ai lea o le isi nofoa o le palemene i le vaiaso nei.

Taua e Faimalō i totonu o le Faavae o loo faamanino mai i le vaega 44 (5) o loo taua ai ‘ Sui Usufono faaopopo” o lona uiga o se tamaitai o ia lea o se sui usufono o le palemene , ma le Fainumera aupito maualuga o palota o lona uiga o le pasene o le aofaiga atoa o palota aloaia a se itumalo faaalaalafaga na mauaina e se sui faatu tamaitai, o le ala lea o le filifilia ai o le sui mai Alataua i Sisifo ma sui faaopopo o le Palemene o Samoa ia talafeagai lelei lea ma le 10 pasene o nofoa mo tamaitai i le palemene.

E pei ona silafia o le iuga o le faigapalota a Alataua Sisifo na tulai mai ai le aofai o palota a le sui tamaitai ia Aliimalemanu Moti Momoemausu Alofa Tuuau i le 464, o le aofai o palota faaogaina i lea itumalo lea e 1059, a faapasene ia fainumera ona maua lea o le 40 pasene mo Aliimalemanu,

Na faamanino mai e le komesina o faigapalota e leo le aofai o palota e taulia ae o le aofai atoa o pasene e maua ai le iuga sa’o. O lona talitonuga o le vaega lea o loo nenefu ai le atunuu.

Na fesiligia Faimalō i se tulaga o le toe fai ai o se faigaplaota pe a faapea e faatumauina pea le tutusa o le aofai o sui faipule o vaega faaupufai e lua i le ta’i 26 ae tali Faimalō ua lava tapena le ofisa o le faigapalota mo se isi faiga filifiliga.