O le taofia ai i le atunuu o Solomona o le susuga Leiataualesā Jerry Brunt ma le tagatānuu o Vanuatu sa avea ma faamasino o le tauvaga o le Tausala o le Pasefika, ona sa fia maua e lea malo ni o la finagalo i le tele o tuua’iga sa laumanu’ia ai ni gaioiga faasolitulafono i le faafoeina o le tauvaga.
O le faamatalaga lea mai le malo o Solomona e pei ona lipotia ai e le nusipepa o le Samoa Observer.
Ua faailoa ai foi e le malo o Solomona sa faia le taofiga mo i latou uma sa avea ma faamasino o le tauvaga peitai e tuuina atu le poloa’iga i le matagaluega o femalagaa’iga a lea malo mo le taofia o i latou, ae ua malaga ese isi, maua ai loa na o le faamasino mai Vanuatu ma Samoa.
Na faaalia foi e lea malo na mafua foi lea faai’uga ona o le tele o faitioga na tuua’ia ai le faamasinoina o le tauvaga.
Peitai e ui ina tuua lea atunuu e le sui mai Samoa ma le atunuu o Vanuatu e aunoa ma ni mau e faamaonia ai ia tuua’iga, ae ua faaalia e le malo o Solomona o loo faaauau pea a latou su’esu’ega.
E taotao tua mai le finagalo o lea malo i le pepa o faamatalaga faalaua’itele mai le Komiti Faafoe e pulea le tauvaga o le Tausala o le Pasefika, ua na ona faailoa ai o le loto faanoanoa i le tulaga na aliali mai, ae aunoa ma se ta’ua poo ai na mafua ai, ae o ai foi na fafauina ia tuua’iga.
E leai foi se upu e tasi o afea ai faamasino na taofia le malaga ese ma Solomona.
