O le 8:30 (taimi samoa ) i le taeao nei lea na amata ai folasaga o le tagi a le vaega faaupufai a le Faatuatua i le Atua Samoa ua Tasi faasaga i le solifaavae ma le solitulafono o le Malelega a le Ao o le Malo ina ia faaleaogaina uma iuga o le faiga palota muamua a Samoa ae toe valaau se isi faigapalota i le aso 21 o Me 2021.
I se ripoti mai le sui o le Radio Samoa Galumaleana Tipi Autagavaia na mua’i faia folasaga a le Loia o loo tulai mo le FAST Taulapapa Brenda Heather Latu, ma e oo mai i le taimi nei e le’i maea folasaga a le vaega o loo tagi poo le FAST.
Taua e Galumalemana a maea folasaga a le itu tagi ona tuu lea o le avanoa i le itu tali poo Loia a le Ofisa o Faigapalota ma le loia o le HRPP le afioga Aumua Ming Leung Wai mo a latou folasaga.
E iai le manatu o le aso atoa lenei o le a faia ai finauga ma folasaga a itu uma e lua ma na taua e Faamasino Sili Satiu Simativa Perese, ia maea ifo ilea so uma tuu atu uma i luma finauga a vaega uma e lua.
Taua e Galuemalemana o le fa’aataataga o le mataupu i le asō , afai e lē tuuina mai i le Aso a taeao se iuga o le ā maua le iuga i le Aso Gafua o le vaiaso fou.
