Ua tali le matagaluega o leoleo, falepuipui ma le ola toe fuataina i faasalalauga ua agiga i fesootaiga televavave, le api o foliga ua faailoa ai suafa o nisi e fesootai i le maliu o Tu’au Faasavalu i se faalavelave tau taavale i Vaitele i le tausaga e 2021.
Ua faailoa e le matagaluega o loo faaauau pea suesuega, ae o faamatalaga ua salalau i luga o upega tafailagi e leai se faamaoniga.
O faamatalaga foi o loo tuuina atu mo suesuega o loo galulue ai leoleo ma le vaega o loia a le matagaluega e sailiili lelei ina ia mautinoa.
E pei ona silafia le salalau ai i luga o fesootaiga televavave o se faatalanoaga a se taulealea o loo ia faamatala ai lea faalavelave i lana faamatalaga sa iai tonu i le taimi o le faalavelave, peitai ua faaalia e leoleo e lē tatau i tagata lautele ona latou faasalalau ni faamatalaga e lē faamaonia e faavae mai i ni faasalalauga faapea.
Ua aumai ai foi le faamanatu a le matagaluega o leoleo i le atunuu o se solitulafono le faia o ni tala e lē moni, ae o tala faatupu poo tala o le ualesi mosooi.
Ua silia nei ma le lua tausaga talu ona maliu Tu’au Faasavalu, e lei maua lava e leoleo ia latou suesuega ni mau e molia ai se tagata poo ni tagata.
E lei maua foi ni mau e iloa tonu ai le taavale na aafia ai le soifua o lē ua maliu.
