Ua faailoa e le afioga i le Faamasino Sili le afioga Satiu Simativa Perese se atugaluga o le faamasinoga i le gaioiga a matai o Salelologa na latou suesueina ai se tina na faatō’ai i leoleo lana tagi faasaga i se matai o lea afioaga.
O lea atugaluga na faaleo ina ua lau le faasalaga o Matamua Ieremia Leatio’o poo Ieremia Iosefa o se tamā matua e iai lona tofi tiakono i lana ekalesia, ae sa galue o se ave taavale laititi la’upasese.
Sa tula’i lea matai i le faamasinoga ona o moliaga o lona taumafai e faamalosi se tamaitai ua 39 tausaga o lona matua.
I le tusi a le Pulenuu o Salelologa na tuuina atu e lagolago ai itu lelei mo lē ua molia, sa ia faailoa ai sa aami e alii ma faipule le tina na tagi e oo atu i le fono a le nuu e faamatala le mea na tupu.
O le taunuuga o lea faamatalaga e pei ona faailoa e le Pulenuu i lana tusi e leai ma se mea e moni ma sa’o o tuua’iga faasaga i le matai na molia.
I le silasila a le faamasinoga o se gaioiga ua sosopo ai matai i le galuega a le faamasinoga, ma a fua foi i le toatele o matai i le saofa’iga a alii ma faipule e fulisia i le itupa o tama tane.
O le faai’uga a le Faamasino Sili ua nofosala ai i le falepuipui Matamua Ieremia Leatio’o mo le 18 masina, ae toesea ai ni aso sa nofo taofia ai i le vaaiga a leoleo.
Ua faatonuina le faamauina o le suafa o lē ua nofosala i le lesitala o tagata ua faamaonia solitulafono o gaioiga tau faiaiga le sex offender register.
Na faatino e lē ua nofosasala le gaioiga solitulafono a o fealua’i i lana taxi, lea sa ia ave ai lē na tagi i se nofoaga tuufua ma taumafai e faatino ai le solitulafono sa ia ioeina.
Sa ia faaaogā ai se agaese laititi e faamata’u ai lē na tagi, peitai sa mafai ona sola ese lē na aafia.
