O le 84 o fanau o loo tausia i le nofoaga o le Campus of Hope ona o sauaga ua aafia ai, o le a lē galo ia i latou le Kerisimasi o lenei tausaga o le a mae’a, ona o le agalelei o le aiga o Telea i Faleula.
O le loto foai o lea aiga na latou faimeaalofa ai i ia fanau a le atunuu e ala i oloa eseese ma le foai tupe e fa afe tala.
Ua faailoa e le Peresetene o le faalapotopotoga o le Toomaga mo ē Puapuagatia o loo iai le vaaia o le nofoaga o le Campus of Hope o loo tausia ai ia fanau sauaina, o le faiga meaalofa a le aiga o Telea, na mafai ona faatinoina ona o seleni sa maua mai ia latou taaloga bingo.
Ua faailoa foi e le Peresetene o le Toomaga le faletua o Siliniu Lina Chang, ua masani ai lea aiga i le faimeaalofa atu pea i fanau sauaina ma o se tasi lea o fuafuaga faifaipea a le aiga i tausaga uma, o le asiasi atu i le nofoaga ma feiloai i fanau ma tauaao atu meaalofa ma foai tupe auā le fesoasoani ai i le tausiga o fanau ua sauaina.
O le tina i a Solamalemalo Fou o loo taitaia le polokalame agalelei a le aiga o Telea i Faleula lea sa latou asia le nofoaga o le Campus of Hope a o lumanai le Kerisimasi.
Ua faailoa e le Toomaga ua siitia i le 12 pasene le numera o fanau sauaina ua faamautu i le nofoaga o loo latou tausia ma vaaia ai fanau ua aafia i sauaga o le tino, ma le mafaufau e amata mai i pepe ua 3 masina e oo i le 18 tausaga le matua o loo iai nei i le nofoaga.
