I se lipoti mai le auaunaga a leoleo talu mai le vaiaso na tea nei e oo mai i le tuanai o le Kerisimasi, e tolu ni maliu o loo faia iai suesuega i le taimi nei ma ua molia ma taofia ai nisi i le masalomia i ni gaioiga solitulafono e fesootai i tagata ua maliliu.
O le Aso Sa o le Kerisimasi na taofia ai e leoleo se alii 20 tausaga ma molia i le faaoo o le maliu i se alii 28 tausaga le matua.
O le tasi o mataupu o se solitulafono foi o le fasioti tagata faamoemoeina ua molia ai se alii 30 ma ona tupu tausaga o lona matua ona o le fano o le soifua o se tamaitai 31 tausaga i se laau malosi.
O lē ua maliu e pei ona faailoa e leoleo o se tasi o Malu o le Malo, ma o lea faalavelave na tupu i le po o le Aso Faraile a o lumanai e Kerisimasi.
O le tasi o maliu o se teineititi 12 tausaga le matua na maliu i le faamatalaga mai leoleo, ua molia ai lona tamā 38 tausaga le matua.
O loo tuuaia le tamā i lona faaoo o le maliu i lona afafine ma o loo iai le talitonuga o leoleo na fasi e lē ua molia lē ua maliu.
O le a faato’a iloa tonu aafiaga i ni manu’a o le teineititi pe a mae’a suesuega a fomai ma leoleo.
O loo nofo taofia i le vaaiga a leoleo i latou ua molia, ma ua faatulaga o le faaiuga o le masina o muamua nei o Ianuari o le a oo atu ai i latou i le faamasinoga mo le valaauga muamua o o latou moliaga.
