O le folafola ai e le vaega faaupufai o le Faatuatua i le Atua Samoa ua Tasi a tula’i e pulea le malo o le a latou soloia teuteuga o le tulafono faavae na fausia ai le tulafono o Faamasinoga o Fanua ma Suafa o le tausaga 2020, o lea ua taunuu ina ua maua le fuainumela e 36 o nofoa e 53 o le paea’iga lona 17 o iai nei a le Palemene.
O sui faipule uma ia o le vaega faaupufai o loo tauaveina le pulega o le malo e aofia ai le Fofoga Fetalai ma le sui faipule e to’atasi o le Itu Agai le tofa Maulolo Tavita Amosa.
Sa palota lagolago i latou e aveesea ia tulafono e pei ona silafia sa mafua ai ni feteena’iga o manatu ma finagalo faaalia o le atunuu, aemaise o le sosaiete a loia i le atunuu ma le faamasinoga a Samoa, a o tapena ia tulafono ma teuteuga o le faavae, le tuuina atu i le fono aoao i le paea’iga talu ai poo le paea’iga lona 16 lea a le Palemene, a o tula’i le vaega faaupufai e puipuia aiātatau a tagata i le pulega o le malo ma le atunuu.
O le ausia ai o le lua vae tolu e pei ona saofia ai le pasia o teuteuga o le faavae 2025 ua pasia ai foi ma teuteuga o le tulafono o Faamasinoga o Fanua ma Suafa o le tausaga 2025.
O se tusitusiga i le itulau a le Matāgaluega o Faamasinoga ma le Faafoeina o Auaunaga tau Faamasinoga o loo faailoa ai o le amata faamamaluina o le tulafono o teuteuga o le faavae 2025, o le a faatino i se aso e filifilia e le ta’ita’i o le malo le Palemia lea, ae o le tulafono o teuteuga o le tulafono o Faamasinoga o Fanua ma Suafa 2025 e faamamalu i se aso e filifilia e le afioga i le Minisita o le Matāgaluega o Faamasinoga ma le Faafoeina o Auaunaga tau Faamasinoga.
Ua faailoa foi e le matāgaluega o le a faasalalau faalaua’itele mo le silafia e le atunuu aso o le a faamamalu ai ia tulafono ua pasia.
O le a latou faatino foi le faasolo o polokalame faalauiloa a le matāgaluega i nuu ma afio’aga ma le atunuu atoa ina ia nofo silafia ai ia tulafono teuteu e pei ona ta’utino le Matāgaluega o Faamasinoga ma le Faafoeina o Auaunaga tau Faamasinoga latou te faia a o faagasolo faatalanoaga o ia tulafono e pei ona sa savalia ai le atunuu e sa’ili ni o latou finagalo.
