Ua faamalosia le tapunia o faitotoa o le aoga a Rangiora High i le itu i Matu o Canterbury i le mae’a o lipoti e toeititi atoa le 50 o faiaoga ua aafia i le Koviti-19.
O le aoga lea e pe ā ma le 30 minute mai le itu i Matu o Kalaiesetete ma ua o latou faailoa i se faaaliga i luga o le facebook page a le aoga, le tapunia o le aoga i le asō.
Fai mai e 39 faiaoga o loo aafia ma faiaoga fesoaoani e toa 10 o loo aafia foi.
O le latou faamatalaga e faapea ua lē fiafia i le faatino o lea tulaga i lenei taimi a o faatoa amata le tausaga faaleaoaoga ae o loo naunautai i se tausaga faaleaoaoga manuia.
Saunoa le pule aoga o Bruce Kearney i le lipoti a le Newstalk o le tapunia o le aoga e lē mafua mai i le koviti ae ona toeitiiti o le tasi vae tolu o faiaoga o le aoga e lē o avanoa ane ma e faigata tele ona faatulaga aoaoga mo le fanau ae lē o lava ane faiaoga.
O lona uiga faatoa toe foi atu tamaiti i le aoga i le Aso Lulu auā o taeao o le aso malolo o le Waitangi.
O loo ta’ua i lea lpoti o le sapalai o antigen tests mo le koviti e tatau ona faamae’a i le masina lenei ae ua faailoa e le minisita o le soifua maloloina, Shane Reti o le a faatau e le Te Whatu Ora le isi 5 miliona o tests e tufatufa e aunoa ma se totogi.
