O le tuanai o le Aso Sa o Tamā i Samoa ma faaauau pea le tautuaina o le atunuu femalagaa’i i le va o motu o Upolu ma Savaii, e vaa la’upasese o le malo, o le Aso Gafua na lipotia ai se faalavelave na tupu i luga o le vaa o le MV Samoa Express II na manu’a ai se tasi o alii seila o le auvaa.

Ua faaalia e se molimau o se tagata na malaga ai i le malaga a lea vaa mai Mulifanua i Salelologa, o le faalavelave na tupu ina ua oso se tasi o loli sa i le malaga a le vaa i le aao poo se tasi o vae o le seila.

O se tasi lea o faalavelave ua fesiligia ai le saogalemu o pasese ma le auvaa i luga o ia auala o feoa’iga o loo pulea ma vaaia e le faalapotopotoga o vaa a Samoa o se auaunaga a le Malo.

Ua fesiligia ai foi ma amio a nisi o avetaavale i le taimi e faaee ma taunuu ai le vaa.

E lei manuia taumafaiga i le pulega o le faalapotopotoga o vaa i se faamatalaga e tusa o le faalavelave na tupu, ae e iai le talitonuga o loo faagasolo iai se su’esu’ega e lē gata o le faalapotopotoga o pulea malaga a vaa i le va o motu o Upolu ma Savaii faapea ma le va o Apia ma Pago Pago, ae o loo faia foi iai se su’esu’ega a leoleo.

O le falema’i i Tuasivi na faavave atu iai le alii seila na aafia i ni manu’a mai lea faalavelave.

Na pau lea o le faalavelave na tupu i le aso mālōlō o le Aso Sa o Tamā i lo tatou atunuu.