O le auina atu o le vaa leoleo a Samoa le Nafanua II i Ausetalia mo le toe faaleleia ua galulue nei le vaega o puipuiga o le ogasami mai Amerika le US Coast Guard Oliver Berry e faia lea galuega taua mo Samoa i le taimi nei.
O le au vaa a le Oliver Berry ua faia nei le tiute o le vaaia o ni faiga faasolitulafono i ogasami o Samoa ma ni fagotaga lē faatulafonoina i totonu o ogasami o le atunuu.
Na tuu mai le tauau fesoasoani a le Mālō o Amerika e ala i lea auaunaga ina ua auina atu le vaa leoleo a le atunuu e toe faaleleia. Taua e se sui o le auvaa Commander Jeff Bryant “E fiafia tele e tuu mai le latou fesoasoani mo Samoa ina ia tumau le saogalemu o ogasami a le atunuu e le gata mai i fagotaga solitulafono ae o ni faalavelave faalenatura e mafai ona o latou puipuia ai Samoa”.
Ua tele tausaga o galulue faatasi le Mālō o Samoa ma le Pulega o ogasami a Amerika ma o se tasi nei o galuega faapaaga a atunuu e lua ina ia mautinoa le faatino pea o galuega faapea foi le saogalemu o le atunuu.
E pei ona silafia o le vaa leoleo a le Nafanua II na paulia i se vaega o le aau i le agai atu lea i le
Uafu i Salelologa na afua ai ona faaletonu.
E le’o mautinoa le umi o le faaleleia o le vaa leoleo a le atunuu le Nafanua II ae mo le
taimi nei o le a faaauau e le au vaa mai Amerika galuega o puipuiga o le ogasami a le atunuu.
