O soo se faaoolima ma ni sauaga faalotoifale o aiga ile va o se ulugalii ma lana fanau, e matua leai se avanoa ile tulafono pe a faamaonia.

O le taunuuga o le tama o Ellisara Sefo o Fasitoo uta ina ua faamaonia lona faaoolima ile faia o se faaoomanua tuga i lona toalua.

E fa tausaga ua tuli nei o lona faasalaga faafalepuipui ina ua aumai le faaiuga a le afioga ile Faamasino sili ma ua momoli atu ai se feau taua i tama ma e o loo faia lea gaioiga solitulafono e leai se avanoa moi latou o le falepuipui lava.

O le ua faasalaina na taunuu ilo latou fale ile po ise taimi o le masina o Me o le tausaga nei. E taunuu ua monoe uma le la fanau e toalima ae ua nao si ona toalua o loo ala. Faaalia e leoleo ia latou faamaumauga na savali faasasao atu Elisara ma faatino loa lana solitulafono o le faaoolima e ala ile tui o le mata tauagavale, toe faasaga atu ile isi mata ao faataitaio lona toalua ma tau valaau ile fia maua o se fesoasoani.

Na oo lava le ogaoga o le gaioiga a le ua faasalaina i lona u o le taliga o lona toalua ma alu ese ai se vaega o le lau taliga le ear helix. E leai se loia na tulai mo Elisara ae sa ia ioeina uma moliaga a leoleo.