O lagona o le fiafia ma le faagaeetia ia Annie Kaio Togia o le sui tauva a le asosi faafafine i Hastings Niu Sila poo le Teine o le Apu ina ua faapaleina e avea ma tausala o faafafine Samoa 2023-2024.
I se pepa o faamatalaga mai le Faalapotopotoga o le Asosi o Faafafine i Samoa, o lenei tauvaga o le faalauiloaina o taleni ma tomai ma agavaa o le latou itupa e tusa ai ma le olaga tuputupua’e i aso uma faapea ma lo latou sao i le atinaeina o Samoa e le gata iinei a o atunuu e mamao.
E toafitu i latou na tauva ma o se vaaiga maoae i le tulaga o le tomai ma mafaufauga e ala lea i le tulaga o teuga eseese o se faailoga o le maualuga ua iai taumafaiga a nei alo o le atunuu.
E 6 faailoga na manumalo ai Kaio e aofia ai le taliina o fesili poo le Interview, Popularity, Swimwear, Evening Gown, Creative Wear ma le Taleni.
O le tauvaga tausala lenei o le taualuga lea o polokalame faamanatu a lenei faalapotopotoga i le faamanatuina ai o lo latou sao tāua ma ana auaunaga mo le atunuu i soo se atinae.
