O le manumalo talu ai nei o alo fusu lauiloa o Samoa le susuga ia Jai Opetaia ma Lupesoliai Joseph Parker ia la fusuaga faavaomalo, ua avea o se ave fu’a tāua tele mo le faalauiloaina o Samoa i le lalolagi ma siitia ai le atinae o tagata tafafao mai fafo.
O le lipoti faalauiloa masani a le Pulega o Tagata Tafafao i Samoa o loo ave ai le faafetai a le Ofisa Sili o lea pulega ia Jai Opetaia ona o ia o se amepasa tāua mo le atinae o tagata tafafao mai i le atunuu.
Ua faapena foi ona ave le faamalo ia Lupesoliai Joseph Parker a le tamaitai Pule Sili le afioga Toleafoa Pativaine Petaia Tevita, ma moomooga ia faaauau pea le a’e manuia o taumafaiga a ia tamafanau a le atunuu auā o le a saga siitia ai pea le tulaga lelei o le atinae o tulisi i Samoa.
Ua faailoa e le pulega o tagata tafafao i lana lipoti faalemasina, o le a faaauau pea tulaga lelei ua iai nei le atinae, i le tuanai ai o mafatiaga ogaoga ona o le faama’i Koviti-19.
O loo valoia e le pulega le tulai mai o le atinae lenei i se tulaga sili ona manuia ma sologa lelei, a o tulimatai ai ana fuafuaga mamao mo le faaleleia o lea alagatupe lelei mo le tamaoaiga o le atunuu.
