O Peresetene Donald Trump, o se ulua’i Peresetene lea a le Iunaite Setete o Amerika, ua faasalalau tuusa’o mai i lona ofisa i le Fale Pa’epa’e poo le White House, lana malelega faamanuia ia Amerika Samoa i le faamanatuina o le 125 tausaga o lana Sisigafu’a, e pei ona faamanatuina ai i le aso 17 o Aperila i lenei tausaga ma tausaga ta’itasi.
I lea saunoaga a le Peresetene, e lē gata ina momoli mai lana faamanuiaga ia Amerika Samoa i lona aso faapitoa, ae sa viiviia ai ma faafetaia e Trump augatamā uma o le atunuu ua lagomau mai tiasa, o le telē o le lagolago ma le tautua a alo ma tamafanau o Samoa o loo auauna ai i le malo tele i le tulaga o vaega’au, o le sao o Samoa i le faalauiloaina o lana aganuu, o lona sao i ana tamafanau o loo lauiloa ai Amerika i taaloga, o pisinisi ma tomai faatufugaga i ona vala eseese.
Sa faailoa foi ma viiviia e le alii Peresetene le tautua ua ausia e se tasi o alo o Amerika Samoa, le tamaitai o Tulsi Gabbard, o ia se ulua’i tamafanau a Amerika Samoa ua tautua i totonu o le Kapeneta a le Iunaite Setete o Amerika.
Na matuā laulogo atoa le Malae o Lupelele a o saausi le faafofoga a malo faaaloalogia ma le mamalu uma o le atunuu na potopoto ai i lea aso, i le momoliina mai o le malelega faamanuia a le afioga i le Peresetene o le Malo Tele, i lona faamatilatila mai ma faatāuaina sootaga mafanafana i le va o Amerika Samoa ma le Iunaite Setete.
Puna o Faamatalaga: https://www.facebook.com/watch/?v=1365309661402357
