O le faalapotopotoga o tinā i Samoa o loo galulue i le totōina o soo se laau tau faato’aga ma laau faamatagofie fanua le Samoa Association of Women Growers, o loo faatino se latou polokalame o loo faasavali i komiti a tinā i nuu ma afio’aga, i le autū e tufa ma faasoa atu iai, auala ma metotia e mafai ona saunia ai mea taumafa ia lelei ma umi ona teu malu, faapea foi ona tufa ai ma tomai i le sauniga o mea’ai mo aiga aemaise o isi taumafaiga tau atina’e e fesoasoani ai i le itu tau tupe.

O le komiti a tinā o le afio’aga o Tuanai na afea e le polokalame faalea’oa’oga ua faaigoaina o le Siamufest lea sa auai ma nisi o tinā mai afio’aga tuaoi o Afega ma Leauvaa.

O se taumafaiga ua faailoa i se faasalalauga o loo fesoasoani ai i le ituvai o tinā ma tamaitai e faatino atina’e mo le manuia o o latou aiga, e lē gata i le tausiga i le itu i taumafa ae o le maua ai foi o ni seleni e lagolago ai i fuafuaga fai masani i le aiga.

Ua molimauina e le faalapotopotoga e pei ona faailoa i le faasalalauga, le to’atele o tinā ua latou selesele i faamanuiaga o le maua o le tomai mai ia a’oa’oga, e pei ona ua mae’a ona faatino i le afio’aga o Vavau, ae o loo silasila e faaauau atu i isi nuu ma afio’aga o le atunuu.