E 5 miliona isi rapid antigen tests poo RATs lea o le a toe faatau mai, ma e aumai ma tufa fua uma.

O le sapalai o loo iai nei sa tatau ona uma i le masina o Fepuari ma o lea na faailoga fesili pe toe faatau mai e le malo nisi RATs pe leai.

I faamaoniga mai le minisita o le soifua maloloina, Shane Reti ananafi, o le faaiuga o Iuni lea o loo faamoemoe e faaalu uma ai le sapalai 5 miliona o RATs ua toe oka nei, ma a uma lea ona toe faatalanoa lea o sui o le soifua maloloina pe toe moomia nisi RATs pe leai.

Mai le sui o le National Public Health Service, o se avanoa lelei lenei e faaaogā ai e tagata lautele siaki maua fua ua toe faatau mai e le malo, aemaise lava i tagata e lē o malosi atoatoa ma o loo maua i āuga o le Koviti.

Ae i se toe tepa i tagata ua lipotia ua maua i le Koviti i totonu o Niu Sila, o lea e pei ua sau mālie i lalo le toatele o cases ua lipotia, pe a faatusa i le taimi na maualuluga ai fuainumera i le faatoa uma o le Kerisimasi.