Ua faailoa faalaua’itele mai nei e le pulega o le faalapotopotoga o le taaloga soka i Samoa le tapena ai e talimalo i le taamilosaga sue siamupini o le soka i le vaega o alii i le matutua e i lalo o le 19 tausaga mo atunuu o le Oceania.
O le ‘au o le a siamupini o le a fai ma sui o atunuu o le Oceania i le Ipu o le Lalolagi i le taaloga soka mo ‘au a alii e i lalo o le 20 tausaga le matutua, o le a faia i le atunuu o Chile i le tausaga fou.
O le talimalo ai o Samoa i le suega siamupini a le Oceania mo ‘au a alii e i lalo o le 19 tausaga e faia i le aso 7 i le aso 20 o le masina fou o Iulai, ma o le a tausinio ai ‘au e valu mai atunuu o le Oceania.
Ua faailoa e lua vaega ua vaevae iai lea taamilosaga sue siamupini o le vaega ‘A” o le a taaalo ai ‘au mai Fiti, Tahiti, Solomona ma Vanuatu, ae o le vaega “B” o le a taaalo ai ‘au mai Niu Sila, Niu Kaletonia, Papua Niu Kini ma Samoa.
O taaloga uma o le a faasalalau tuusa’o i fesootaiga televavave i le tautua a le pulega o le taaloga soka i le lalolagi le FIFA e aunoa ma se totogi.
