A o faagasolo suesuega a leoleo i se gaioiga solitulafono ua aafia ai se tina i ni manu’a mai se aupega ma’ai e masalomia o se agaese, ua nofo taofia nei i le vaaiga a leoleo se alii e faapea o le toalua lea o le tina ua aafia i manu’aga lea o loo taofia i le falema’i i Motootua mo togafitiga.
Ua faailoa e le Komesina o leoleo i se lipoti le molia o lea tagata i lona taumafai e faaoo le oti i se isi tagata, o lona umia o se aupega matautia, ma le faaoomanu’a tuga.
Faaalia i lea lipoti ua 3 vaiaso e lē o toe mafuta faatasi lē ua molia ma lona toalua, ae o le taeao o le Aso Sa na te’a nei na agai ai loa le tamaloa i le aiga o le tina ma faatino ai le gaioiga solitulafono.
O se mataupu i le va o le ulugalii o loo talitonu leoleo o le mafuaaga lea o le gaioiga solitulafono lea o loo faagasolo iai suesuega.
O le Aso Gafua 19 o Aokuso o le a tulai ai i le faamasinoga lē ua molia.
