‘Sa maua le talanoaga ma MP Teanau Tuiono faapea lona ofisa i le vaiaso ua tuana’i, ma ua aumai ai se faamatalaga, o le aso 10 Oketopa e tatau ona mae’a ai le galuega a le soākomiti (select committee) i le latou lipoti mo le faatalanoaina e vaega faaupufai ta’itasi.’
O se lipoti lata mai lea mai le Fetalaiga a Leulumoega, Tofa Teleiai Edwin Puni.
O lona uiga o se taimi o le faai’uga o Oketopa poo le amataga o Novema pe a usuia le Palemene e faato’ā fai ai le tolaulauga lona lua, ma na ta’ua e Teleiai, o loo tapena ta’i’ta’i o Samoa i Aukilani e auai i le tolaulauga lona lua.
E iai foi le faamoemoe e feiloa’i ma ta’ita’i o Samoa i Ueligitone ma isi aai a o lumana’i le tolaulauga lona lua.
O loo tālia se tali mai a vaega faaupufai a le Labour ma le Te Pati Maori mo se feiloa’iga ma Samoa potopoto e pei ona iai feiloa’iga ua mae’a ma le Green Party, faapea Hon David Seymour mai le ACT Party aemaise o Hon Vaovasamanaia Winston Peters ma le New Zealand First Party.
Peitai o lea ua tali mai le ofisa o Rt Hon Christopher Luxon o loo saili se avanoa ona o le tele o ana malaga o loo iai i fafo i lenei masina.
Afai o le a mautinoa loa se taimi ona faailoa mai lea o se tonu mautū.
O le faanaunauga ia maua se feiloa’iga a Samoa potopoto ma vaega faaupufai e 3 o loo totoe a o lumanai le tolaulauga lona lua.
O le aua’i atu o ta’ita’i o Samoa i le masina na te’a nei i le valaaulia mo le faamanatuina o le isi tausaga o le nofoa’iga a le Tupu o Maori, o se tulaga tāua tele i le nonofo ai i Aotearoa nei.
O le video lea o le taimi o le lauga a Samoa sa tula’i ai i le tootoo le afioga i le Aloalii ia Fepuleai Semi Fepuleai: https://www.youtube.com/watch?v=YOnDkfZoohU
O le ala foi lea o le toe auai ina ua tuumalo le Kiingi Tuheitea Potatau Te Wherwhero VII. O le video lea o se vaega o le faaaloalo a tagata Pasefika lea sa ta’ita’ia e le Pacific Leadership Forum: https://www.youtube.com/watch?v=JaHY8PYCBIU
O le Aso Toonai 5 Oketopa o le dinner mo le Sailiga Malo a Samoa i NZ e faia i le Otahuhu Rugby Club i aukilani.
E $60 i le ticket, ae maua foi le laulau $600 mo tagata e to’asefulu.
Saunoa Teleiai, o loo tagi lava i lima tapenaga i taligamalo o loo faasolo nei, aemaise o le tauaveina o le igoa o Samoa i meafai a Niu Sila.
O le dinner, e pau lea o le auala o loo saili seleni ai.
O ni fesoota’iga uma o loo faasino atu ia Teleiai pe a moomia se ticket poo se laulau a se mafutaga poo se ekalesia foi e fia fesoasoani.
