Ua mautū nei le fuafuaga a le malo i le aumaia o se isi ituaiga o vaa e faia malaga i le va o motu o Upolu ma Savaii e pei ona sa mafua ai ona faia se faaiuga a le kapeneta e malaga le Minisita o Galuega Tetele o loo iai ma le vaaia o le Faalapotopotoga o Vaa a Samoa faatasi ai ma nisi o le Pulega a le Faalapotopotoga, e saili se vaa i Ausetalia.
Ua faailoa mai e le Minisita le tofa Olo Afoa Fiti Vaai o le fono a le Komiti a le Kapeneta i le aso Tofi o lenei vaiaso na faamaonia ai loa le faatauina mai o le vaa o le ituaiga o le Catamaran e tele taavale e ave ai ma pasese.
O le tau ua fuafuaina mo lea vaa fou e 27 miliona tala Samoa.
Ua faaalia e le minisita ua maea ona faamautu feutanaiga ma le kamupani e ana le vaa mo le faia o nisi o suiga i le vaa ma faafou uma ona afi ao lei aumaia i se taimi o le tausaga fou.
