Ua saunoa le minisita o le Puipuiga a Taiwan, Wellington Koo o le poloka mai o latou e Saina o se gaioiga lea tau taua ma iai ona aafiaga tetele i fefaataua’iga faavaomalo.

Ua faatatau faamatalaga a le alii minisita i faata’ita’iga a Saina sa faia i le vaiaso talu ai.

O Saina e manatu o Taiwan o se teritori o lona atunuu ma ua fai si umi o faia pea faata’ita’iga faamiliteli a Saina e lata ane i Taiwan e aofia ai ma war games ma faata’ita’iga o osofa’iga i uafu.

E teena la e Taiwan le manatu lea o Saina ae o le vaiaso talu ai na faia ai foi faata’ita’iga nei a Saina faataamilo ia Taiwan ma ona uafu ma ua saunoa ai loa le minisita lea a Taiwan afai e fia faatino ni gaioiga faapea a Saina, a fua i tulafono faavaomalo o lona uiga o le a poloka vaalele ma vaa mai le toe ulufale i ona laueleele.

O lona uiga la a fua i tulafono a Malo Aufaatasi, o ia gaioiga ua faaata atu ai se taua.

Fai mai le minisita o le ⅕ o oloa faavaomalo e pasi atu i le Taiwan Strait o lona uiga afai ae poloka e Saina ia feoa’iga o le a iai aafiaga ia Taiwan ma e lē mafai ona nofonofo ai le komiuniti faavaomalo ma tau ina matamata.

E lē o iai se tali a Saina i faamatalaga ia mai Taiwan i le taimi nei a o mata’itū ai pea e le to’atele mea o loo tutupu mai i lea faaitu o le lalolagi.

Puna o Faamatalaga: https://edition.cnn.com/2024/10/23/asia/taiwan-china-blockade-act-of-war-intl-hnk/index.html