I le faagasolo ai o polokalame ma faamoemoega i le faamanatuina o le 100 tausaga talu ona faavae le aoga o Avele, e lei manofonofo foi le Sui o le Tupu o Peretania i le Atu Kuki i lona fia auai i lea faamoemoe tāua.

O le afioga ia Sir Tom John Masters o se tama tuai o le laumua, ma o se malo faaaloalogia foi lea mo le faamanatuina o le 100 tausaga o le kolisi.  

O le taeao analeila na umusaina ai le fale tele poo le maota o le Sinaleavele i le laumua i Avele.

O se maota na mafai ona faatupeina lava e sui o le ACOPA.  

I le tatalaga aloaia na saunoa ai Sir Tom John Masters i lona agaga faafetai ma lona loto faagaeetia i tapenaga uma mo le faamanatuina o le 100 tausaga a Avele. 

Na maitauina foi le momomo o le loto o lenei tamalii a o toe tomanatu i taimi a o ia aoga i le laumua.

Ma ia faaalia ai ona moomooga, ma ia ta’ua ai, e lē afaina lava lona toe aoga faalua ina ua fesiligia e nisi o aufaasalalau i sona lagona i le auai atu i le faamoemoe a Avele. 

O Sir Tom John Masters o se tama tuai o Avele na aoga i le laumua mai le tausaga 1960 agai le 1962.

O se sui tuai o le aoga ua iloga lona tulai mai i le Atu Kuki ma o ia e lona fitu iai sui ua avea ma Sui o le Tupu o Peretania (King’s Representative to the Cook Islands) ma o sē sa avea ma Sui Palemia o le Atu Kuki, Minisita o le Va i Fafo ma sui ta’ita’i o le Vaega Faaupufai o le Cook Island Party.

O loo auai atu Sir Tom John Masters ma si ona faletua e molimauina matati’a ua aulia e Avele.