E to’asefululua Malu o le Malo ua ave iai le faaaloalo ma manatua le latou auaunaga i le atunuu i le sauniga faaleoleo e faia i tausaga ta’itasi e manatua ai le tautua a Malu o le Malo.

O se sauniga tāua foi auā e manatua ai i latou ua fai i lagi le folauga sa tautua ma galulue faapea i latou na fano ola ma soifua ona o le faatinoga o le galuega.

O le tausaga nei e to’a sefululua i latou sa ave iai lea faaaloalo i le sauniga o le Police Remembrance Day sa faamanatu e ala i se sauniga lotu i le malumalu o le Ekalesia Metotisi i Matafele i Apia.

O nisi ua maliliu e aofia ai lē sa avea ma Komesina mo ni tausaga se tele ua tuana’i le afioga Saunoamaalii Sonny Schuster.

O isi e aofia ai Leavasa Solomona Asi Leavasa sa umia le tulaga faaleoleo o le satini sinia, faapea le afioga Tupuola Tusa Misi Tupuola, o lē sa umia le tulaga faaleoleo o le satini susuga Leiataua Pule Ainuu, o le susuga Lega Sagaga Galu Crichton sa avea ma Komesina lagolago, o Seve Musu Talai sa avea ma leoleo asiasi poo se Detective Inspector, o le susuga Samia Iosua Samia sa avea ma leoleo satini sinia, o Mamea Peniamina Perite sa avea ma satini poo se Detective sergeant, o Alexander Fania ma Solialii Paitomaleifi sa umia tulaga faaleoleo o le taai lua le Corporal, ma Avia Viiga sa galue i le vaega o ta’ifau sosogi a le matagaluega o leoleo, falepuipui ma le toe fuata’ina.

O se tasi na amana’ia ma manatua lana tautua i le sauniga o lenei tausaga o le susuga i le leoleo o Constable Vaitoelau Robertson.