O le manaoga o tagata Aukilani, ia faatau ese atu nisi o sea a le council o loo iai nei i le malaevaalele i i Aukilani.
O le taeao ananafi na fono ai councillors a Aukilani e talanoa le paketi faaletausaga o le 2023/2024 e tusa ma le faaiuga o faatalanoaga sa faia.
O le avanoa foi lenei sa tatala mai mo manatu o tagata Aukilani o loo tau saili ai pe a faafefea ona toe faatumu le gau e $295 miliona o le paketi.
Saunoa le pulenuu Wayne Brown o le uluai faatalanoaga lea a Aukilani ua faamauina i tala faasolopito le toatele na faaali manatu ai, lea e silia ma le 40,000 ma ua fai mai ai le pulenuu ua tatau ona faalogo i tagata.
O le toatele foi o tagata Aukilani o loo mananao e faaitiitia tupe faaalu, e ui e eseese itu o loo mafuli iai finagalo i poloketi e mananao e faaitiitia tupe e alu ai.
Ae i le fesiligia ai o tagata i le fuafuaga o le faaitiitia o tupe a le council e faatupe ai faletusi, nofoaga faitele faapea polokalame faaleaganuu, ua faaalia le popole o le toatele.
O lea ua faagasolo iloiloga a le council ma le faamoemoe e tatau ona faamautu i le faaiuga o le masina fou, a o lei pasia i le aso 8 o Iuni ma amata aloaia ai mai le aso 29 o Iuni.
