O se avetaavale e aunoa ma se laisenea ua malia nei i le uma ai o le ola o se alii 23 tausaga le matua mai Toamua.
O le tamaitai ia Moemoe Afiafi ua molia i le avetaavale faatamala ua afua ai le maliu ma o loo tālia le tuu atu o sana tali i moliaga uma e 4 o loo molia ai i luma o le faamasinoga maualuga.
O nisi o moliaga faaaopopo o le lē tu lea o le taavale ina ua lavea le alii 23 tausaga le matua, lē umia se laisene avetaavale, ma le ave taavale faamatamala ua afua ai le manu’a i se tasi.
O lē ua maliu o se tamā talavou ia Brandon Hall ma na uma lona ola i le maea ai o le 3 aso o taofia i le falemai tele i Motootua ona o le tūgā o ona manuaga. Na taumafai lea alii e kolosi le auala ae lavea ai loa i luma o le Bluebird Lumber and Hardware i Vaitele.
O le alii loia o loo tulai mo Moemoe Afiafi o le susuga ia Fetu Lagaaia ma na ia talosaga ina ia toe tolopō le mataupu seia saili mai vaega atoatoa (full instructions) e faatatau i moliaga o loo molia ai Moemoe.
Taua i ripoti a leoleo (summary of facts) o le taavale o le ituaiga o le Serena Van na faafoeina lea e Moemoe na ova le saoasaoa ma e le’i tū ina ua tulai mai le faalavelave ona o lona fefe tele, mulimuli ane i le aso na sosoo ai na alu sa’o ma faailoa o ia i le ofisa o leoleo.
