E manatu le taitai o le Leipa Chris Hipkins o le faigamalo fou ua agai i tua ina ua o latou faailoa lo latou lē faamalosia o le faaaogāina o le gagana Maoli, Te Reo Maori.
Fai mai Hipkins e pei ona lipotia i le leitio faavaomalo a Niu Sila, mai tausaga e tele ua tuanai sa faaauau pea e faigamalo a le Leipa ma le National lea gagana peitai e foliga mai o lea ua vaaia se faigamalo fou ua mananao e toe faafoi i tua nisi o tulaga lelei sa iai e faatatau i le faaaogāina o le gagana.
Fai mai Hipkins i lea lipoti, silasila i le matagaluega o le va i fafo ma fefaatauaiga mo se faataitaiga, sa o latou faalauiloa sa latou memo ua ta’ua ai ua tatau ona taofi le faaaogāina e tagata o le gagana Maoli ma e iai minisita ua faailoa i o latou ofisa faalemalo latou te lē toe mananao i matagaluega e toe faaaogā le gagana lea ia latou faamaumauga, ma e manatu Hipkins e sese ia faamatalaga.
Na ta’ua e lē sa avea ma Palemia e na te talia fiafia se national hui poo se faatasiga tele lea e talimalo ai Kingi Tuheitia i le Turangawaewae marae i le masina fou e faailoa ai finagalo i lea mataupu.
E lē o ta’ua i le lipoti se finagalo o le malo i nei faamatalaga.
