Ua folafola nei e Initia ni gaioiga o le a taula’i ia Pakistan i le mae’a o le faalavelave ua fasiotia ai tagata e to’a 26 e pei ona lipotia atu i talafou ananafi, na tafana e ni alii na osofa’ia se vaega o Kashmir e vaaia e Initia.
O nisi la o nei gaioiga e aofia ai le tapunia o le tuaoi autū e fesoota’i atu atunuu e lua ma ua taofia lē tumau foi ma le maliega e faatatau i le fefaasoaa’i o le suāvai atoa ai ma le aveesea mai o sui o malo mai Initia.
Fai mai le BBC ua faalēaogāina foi e Initia nisi o visa umia e tagata Pakistan ma faatonuina i latou ia e aga’i ese mai.
O le fasiotia o nai tulisi i se nofoaga lea i le Atu Himalaya o se tasi lea o faalavelave aupito to’atele ua maliliu ai ma ua tali ane ai nei le malo o Initia e ala i le faia o ia gaioiga.
Ua ta’ua i le lipoti e talitonu le vaega o le sekulati a Initia o se kulupu e igoa o le Kashmir Resistance na faatinoina le osofa’iga e ui e lē o iai ni faamaoniga i le taimi nei ae o loo faaauau pea su’esu’ega.
Fai mai o le to’atele o i latou ua fasiotia o ni alii mai le faatuatuaga Hindu ma o loo aofia ai foi ma se alii Musalemi.
Puna o Faamatalaga: https://www.bbc.com/news/articles/ce8g2njm2d2o
