O le ogasami o loo faatino ai galuega o le mata’itū o ni aafiaga o le gataifale i ni suāuu masaa mai le vaa su’esu’e o le Manawanui, o loo iai ma le vaatau poo se manuao o le fitafita o le sami o le atunuu o Peletania.

Na faamaonia mai e se alii fitafita o le sami o le malo o Niu Sila o loo aofia ia i latou o loo faia galuega fesoasoani i Tafitoala ma isi nuu tu lata i le ogasami o loo goto ai lea vaa su’esu’e le susuga Steve Fitzgerald, o le tasi lea o fesoasoani o loo latou maua, a o galulue le vaega o le ‘aumāulu poo divers mai le fitafita o le sami a Niu Sila, e sa’ili vaega uma o lea vaa.

O le Aso Tofi na taunuu ai le tasi o vaa o le fitafita a Niu Sila le Canterbury ma nisi o meafaigaluega e faaaogā i le galuega o loo faatino i le ogasami o loo goto ai le Manawanui.

O le feiloa’iga ma lea sui o le fitafita o le sami a Niu Sila na feiloa’i atu ai foi i le tamaitai o Louise mai le Iunivesite o Massey o loo auina mai e faufautua i ni galuega e faatino pe a iai ni aafiaga o meaola mai suāuu masaa e faapitoa i meaola o le ituaiga o mamele e pei o laumei.

Faaalia e lea tamaitai e iai ona tomai faapitoa i le puipuia o meaola o le laufanua ma meaola o le sami o le ituaiga o mamele poo mammals, talu ona ia taunuu ma malaga i le ogasami o loo faia ai le galuega, e leai ni vaaiga ua ia molimauina o ni suāuu o to’a i le aloalo ma le vaega tulata i le matafaga.

O se ata video foi sa pu’eina ma iloa ai se laumei i se vaega o le sami o iai se suāuu, faaalia e lea tamaitai poto faapitoa, e leai se faamatalaga ua oo atu o ta’ua ai ni laumei ua mamate. 

O loo galulue faatasi lea tamaitai poto faapitoa i le puipuia o meaola, ma sui o le Matagaluega o Puna’oa Faalenatura ma Siosiomaga.