O le Aso Lua 27 o le masina fou o Me ua faatulaga e toe tauaofia ai le Fono aoao faitulafono, peita’i e oo mai i le taimi nei e le’i maua e le pulega faatonu e aofia ai le Palemia ma le Kapeneta, poo le ā se tapenaga a le Loia Sili a le malo i le faatalauula a le Kapeneta, e tuuina atu se talosaga i le Faamasinoga Maualuga e aumai ai se ta’otoga tonu o le tulafono faavae ma ona aiaiga e faasino i le tofiga o le Fofoga Fetalai.

O lea mana’o o le pulega faatonu sa auala atu i se tusi i le Loia Sili mai le Minisita o le Matāgaluega o Leoleo, Falepuipui ma le Toefuata’ina.

O taualumaga a le Palemene i le masina o Mati sa aliali ai se gaioiga mai le itu a le malo i le Kapeneta sa tuuina atu ai se lafo e faasee tuagalu ai le Fofoga Fetalai i le tuua’iga ua faaitu’au ma ana faai’uga.

O se tuua’iga o loo lalago iai le ta’ita’i ma le itu faaupufai o loo agaia le malo.

Peita’i e pei ona silafia sa lē saofia lea lafo i le faai’uga a le Fofoga Fetalai e leai se vaega o le faavae o aiaia ai se lafo e faatū e aveesea ai le Fofoga Fetalai ona ua lē faatuatuaina.

O le vaega lea o loo finauina e le itu a le malo le tuuina atu ai o se tapenaga a le Loia Sili i le faamasinoga e faamatala ma faauiga ai lea tulaga pe afai e moni e leai se aiaiga o i le faavae e faatino ai sea tulaga.

Sa fesiligia le Minisita le afioga Faualo Harry Schuster i se tulaga o iai lea fuafuaga i le faamasinoga.

Le afioga Faualo Harry Jeffrey Schuster o le Minisita o Leoleo, Falepuipui ma le Toefuata’ina.