O a’oa’oga o se tasi o ivitu tāua i soo se taumafaiga o le atina’e o le tamaoaiga o se Malo ma se atunuu e pei o Samoa, ma a lelei foi ona a’oa’oina tagata o se atunuu o le a manuia taumafaiga o le atina’e o se atunuu.
O itu tāua ia o loo silasila mamao iai le ta’ita’i o le Malo le afioga i le tamaitai Palemia, afioga Fiame Dr Naomi Mataafa, ina ua sainia ai se maliega ma le pulegamalo faaitumalo o le aai tele o Taichou i Saina, a o iai le Palemia i lana asiasiga taualoa muamua i se valaau faaaloalo a ta’ita’i o lea Malo.
O se maliega o le a galulue faatasi ai le pulegamalo faaitumalo a lea aai tele o Saina ma le pulega o le Matagaluega o Aoga ma Aganuu ma le Iunivesite Aoao o Samoa, i ni polokalame e siitia ai a’oa’oga i lo tatou atunuu, e pei ona faailoa i se lipoti a le ofisa sooupu a lo tatou malo e tolu ni a’oga tulagalua i Samoa o le a faamanuiaina ai.
E lei faailoaina poo ai ia aoga tulagalua e tolu, ae mo le malaga taualoa a le tamaitai Palemia i Saina lea e faai’uina i le ogatotonu o le vaiaso nei, o le aumalaga a le ta’ita’i o le Malo o loo aofia ai le Minisita o Tupe ma nisi o faauluuluga o matagaluega a le Malo e pei o le soifua mālōlōina, matagaluega o faato’aga, matagaluega a le Palemia ma le Kapeneta, Ofisa Sili o le Faletupe o le Atiina’e, Ofisa Sili o teugatupe o mavaega tausi le UTOS, Faauluuluga o le matagaluega o le va i fafo ma fefaataua’iga, ma le sui pule poo le Ofisa Sili Lagolago o le pulega o le Iunivesite Aoao a Samoa.
O le Amepasa o Samoa i Saina le afioga Luamanuvae Albert Mariner o loo auai i polokalame uma o lea faigamalaga a le Malo o Samoa i le atunuu o Saina.
O le tausaga fou e atoa ai le 50 tausaga talu ona faipaaga le malo o Samoa ma lea atunuu tele o le lalolagi.
