Ua lē mafai ona faaauau le suesueina e le faamasinoga maualuga o moliaga o le fasioti tagata faamoemoeina, fasioti tagata pa’ivalea, o le faaoomanu’a tuga, ma le faaoolima i se mataupu sa faatulaga e suesueina molimau a leoleo i le masina o Iuni, ona ua lē mafai e leoleo ona tuuina atu lipoti a fomai Saina e toafitu na faia le taotoga faapitoa e saili ai le mafuaaga o le maliu o se alii na fano le soifua i se vevesi na tupu i fafo o le lotoā o le fale kalapu o le Birdies ia Tesema o le tausaga e 2020.

E toatolu i latou na molia e leoleo ma o le toalua ua faaui ese uma ia moliaga sa tuuaia ai, ona o le mafai e fomai Saina ona molimau i le latou lipoti o le  taotoga faapitoa na latou faia.

O se faanoanoaga tele lea o le faamasinoga i tapenaga a leoleo ona o le fua i le soifua na fano ma le oo ane ia Fepuari o le tausaga nei e amata suesue ai molimau, ae ua le maopoopo tapenaga o molimau autu o lipoti ia a fomai Saina mai le taotoga faapitoa.

Mo le silafia o se fesoasoani mai Saina na aumai ai fomai e faia taotoga faapitoa mo nisi o tino maliliu sa aafia i ni suesuega a leoleo.I le mataupu ua faaui ai i tua moliaga o le fasioti tagata faamoemoeina, fasioti tagata paivalea ma le faaoo manu’a tuga, ua faaauau ona suesue na o le moliaga o le faaoolima faasaga i se tasi o alii e toatolu o loo molia, faapea se isi moliaga faapea o loo tuuaia ai le tasi o taulealea lea sa sailia e leoleo i se tusi saisai ona ua lē oo atu i le aso o le faamasinoga.