Ua faailoa ripoti lata mai o le faitauga muamua o nuu i Samoa mai le tusigaigoa 2021 tuufaatasia e le Ofisa o Fainumera Faamauina a le atunuu ma ua matauina le siitia o le fainumera talu mai e tausaga e 2016.
O le manatu autu o lenei faamoemoe ina ia faatino tusigaigoa o tagata ma fale ma e taua le faitau o tagata uma. O le faitauga muamua lea o le faitau aofai o tagata o loo nonofo ma aumau i Samoa e pei ona aoina mai i le Tusigaigoa lea sa faatinoina i le Aso 18 Oketopa – 6 Novema 2021.
O le taimi muamua lea ua faaaogaina ai Itumalo Faa-faipule ma afioaga ua lisiina atu e pei ona aloaia ai le faaaogaina e le Ofisa o Faigapalota a le atunuu ia Aperila 2021. O loo tuufaatasia ai foi le faitau aofai o tagata i alii ma tamaitai i vaega tetele e pei Itulagi Faafuainumera e 4, Itumalo Faa-faipule e 51 ma Afioaga/nuu uma i Samoa e 343
I le kalafi ua faailoa mai i le ripoti o le tausaga e 2016 o le aofai atoa o alii mai le faitauga muamua i itulai faafainumera e oo atu i le to’a 100,892 mo le itupa o tamaitai e tusa ma le to’a 95,087 ma oo atu ai le aofai atoa i le to’a 195,979. I le faatusatusaga la i le tausaga na te’a nei 2021 ua siitia le aofai o vaega uma, e pei o le itupa o alii ua oo atu i le to’a 101,906, itupa o tamaitai ua siitia i le to’a 98,104 maua ai le aofai atoa i le to’a 200,010. O lona uiga e silia ma le to’a 4,000 le faaopoopoga o tagata i totonu o le 5 tausaga.
