O le faafitauli faaauau pea i le faaopopo pea o le totogi o fale e aumau ai tagata, ua faatupulaia ai foi ma nisi faaletonu tau le soifua maloloina ona o le tumutumu o nofoaga ua aumau ai le toatele i Niu Sila.
Pe a fua i faamaumauga mai ofisa o fuainumera a Niu Sila ua faailoa ai e toatasi mai le 9 o tagata Niu Sila e aumau i nofoaga e toatele e nonofo faatasi, pe taitoatolu pe toafa foi e aumau i le potu e tasi.
O ia faamaumauga ua faailoa ai foi o le Pasefika lava o loo pa’ū iai le mamafa o nei aafiaga ona o le 40 pasene o i latou o loo matuai tumutumu nofoaga poo fale o loo aumau ai.
O nisi o nei faamaumauga ua agiga i le lipoti e 10 tausaga, 10 year action plan ua faaigoaina Tamaiti o le Moana 2033, o loo auiliili mai ai lu’itau o feagai ma le soifua maloloina o tamaiti Pasefika ma o loo faatulaga ai ni fautuaga e tatau ona faatino e foia ai ia faafitauli.
Ta’ua i le leitio faavaomalo a Niu Sila o se mataupu lenei sa lotea i le Pacific Child Wellbeing Conference sa faia i Aukilani, na saunoa ai Dr Teuila Percival, e tāua tele le lelei o fale i le soifua maloloina lelei o tamaiti.
