Ua amata faaaogā nei mo le puipuiga o le malaevaalele faavaomalo i Faleolo se faiga faatekonolosi fou o se masini na te faatonutonu le taimi e aogā ai se pepa faamaonia o le puipuiga poo le ID security card e faaaogā e se tagata e ulufale ai i le malaevaalele, aemaise i nofoaga e tatau ona malu lona puipuiga.
O se fesoasoani lenei a le Malo o Niu Sila e tusa ma le 50 afe tala lona tau atoa ma o Samoa le ulua’i atunuu mai le aofa’iga e iva o atunuu ua agai iai lenei fesoasoani a Niu Sila.
Faaalia e le Minisita o pulega o malaevaalele le tofa Olo Afoa Fiti Vaai, o se fesoasoani ua siitia maualuga ai le puipuiga o le malaevaalele faavaomalo o Samoa. O le Aso Tofi na tauaao atu ai lea fesoasoani i le Minisita, e le sui o le Malo o Niu Sila i Samoa le alii Haikomesina o Dr Trevor Matheson.
