E afe tala le faasalaga tupe mo le tagata e le usitaia tuutuuga ma aiaiga ua faatulaga ane mo le kolosia o tuaoi o Aukilani lea ua fuafua e toe tatala ile aso 15 o Tesema.
O loo taua i tala mai le Newshub ile aso e tatau I tagata malaga ona iai se faamaoniga ose negative test sa faia i totonu o le 72 itula ae lei malaga pe faaali foi se faamaoniga ua maea ona faia uma ona tui puipui e lua o le faamai.
O lona uiga o le a tatala le tuaoi ma o le a mafai foi ona toe taliaina e Aukilani tagata mai isi vaega ole atunuu amata atu ile aso 15 lea o Tesema. O le a faataga ai aiga ma uo e toe feiloai ma pisinisi e toe faagasolo auaunaga masani ao lei oo ile Kirisimasi.
O le aso lea ua faamaonia mai ai ia faamatalaga e le tamaitai palemia ma ole a tuu ai foi aiaiga ia seia oo ile aso 17 o Ianuari 2022. O leoleo o le a mataituina ia tuutuuga ma faamalosia tulafono talafeagai pe a le usitaia e tagata aiaiga. O le a faaauau pea foi ona mataitu e leoleo isi solitulafono I luga o alatetele e pei ole ave taavale ona.
Ua faamanino mai foi e le palemia o vaega uma o Niu Sila o le a faasee atu ile faiga fou e pei ona faamalamalama e le malo i se taimi e lei mamao atu le Covid Protection Framework poo le traffic light system e pei ona faaigoa ai foi. O le fuafuaga sa tatau ona amata faamalosia i Aukilani pe a ausia le 90 pasene o ona tagata e maea ona faia tui puipui uma e lua ma o le a faatali uma foi isi falemai faaitumalo seia ausia le tulaga lea ole 90 pasene.
Peitai la o le aso ua taua ai e le palemia ua ia matuai lagolagoina le amata vave loa ona agai ile faiga fou lea e aupito sili atu ona malupuipuia ai tagata ma iai foi se faalototele i tagata ina ia faia tui puipui aemaise ona o le faiga lea e matuai manaomia lava le faaali o tusipasi o tui puipui.
