O loo tumutumu le faletaalo o le Multipurpose Gym i Tuanaimato i le taamilosaga o le Ipu a le Asosi Netipolo a Samoa o loo auai ‘au mai Niu Sila, ma Ausetalia faapea aunetipolo i Samoa
O le afiafi o le Aso Lua na tatala aloaia ai le taamilosaga i se solo a ‘au taitasi ma se ‘ava o le feiloaiga, ma o se taamilosaga ua faaalia i se lipoti o se manumalo mo le atina’e o tagata tafafao i le itu i taaloga.
Faaalia e le Peresetene o le asosi netipolo a Samoa i se feiloaiga ma tusitala i le amataga o le vaiaso o le autu o le taamilosaga o le aumai o tagata taaalo mai Niu Sila ma Ausetalia e saga faaolaola le taaloga i loto o tupulaga talavou o le atunuu auā o latou e avea ma sui o le aunetipolo a le atunuu i tauvaga faavaomalo i le lumanai.
E lei faigofie le tapenaina o le taamilosaga ae peitai ua faailoa e le Peresetene, e maeu le lagolago atu a pisinisi ma tagata taitoatasi faapea foi kalapu i le faamaopoopoina o tapenaga, e pei ona mafai ai ona faataunuu le faamoemoe.
