O le polokalame lenei a le Ofisa mo polokalame o le siosiomaga i le Pasefika poo le SPREP ua autausagā o faatinoina i alo ma fanau aoga, e afifio mai ai e silasila ma maimoa i matafaioi ma tiute tauave ale ofisa lea oloo faatino ile Pasefika.

O le faamoemoe lenei na tatala ai le avanoa i nisi o aoga tulagalua, Kolisi maualuluga aemaise nisi o fanau mai iunivesite e auai i lenei polokalame.

Saunoa le Faatonu Sili, Sefanaia Nawadra i le tatala aloaia ai o lenei polokalame.

“O le faalauiloaina o auaunaga a lenei ofisa e tai lua tausaga ma faatino ma o le avanoa tāua foi lea e faailo ai ma aoaoina ai alo ma fanau i mataupu tāua tau i le siosiomaga a le Pasefika.

“O lenei faamoemoe ua faataunuu i le asō e fesoasoani e tapu’e mafaufau o alo ma fanau i auaunaga a lenei ofisa o loo faatinoina i totonu o le Pasefika.

“O le avanoa tāua lea mo outou fanau tou te fefaasoaa’i faatasi ai ma le aufaigaluega a le ofisa lenei i vaega tou te fia malamalama ai i auaunaga o loo matou galulue ai aemaise o faafitauli o loo feagai ai le siosiomaga i lenei vaitau.

“Matou te moomia le malamalama o alo ma fanau i le aogā o le puipuia saogalemu o lo tatou siosiomaga.”

I le mae’a ai o lenei lava polokalame i le tausaga 2021 ua mafai ai foi ona auai fanau aoga mai atunuu eseese o le Pasefika e faaaogaina auala faatekonolosi e faalauiloa ai auaunaga a le ofisa o le siosiomaga a le Pasefika.

“Ou te faamalosi atu ia te outou fanau aoga ua auai i le asō, ia mafai ona outou tauaveina galuega i le tomai faasaienisi i soo se vaega tau le siosiomaga, o le vaega o suiga o le tau, o le gataifale ma ogasami, auā e iai le taofi o se aso o i luma e mafai ai ona tou omai foi e faaauauina galuega o loo matou faia mo le saogalemu o le siosiomaga.”