Fai mai e toeitiiti 100 loli o fesoasoani mo le itu i Saute o Gaza ua gaoia e tagata ma ua faailoa mai e le UN Agency for Palestinian Refugees, o se tasi lea o tulaga aupito ogaoga ua tula’i mai foi i lea faaitu o le lalolagi.

Mai le 109 o loli o fesoasoani tau taumafa mai Malo Aufaatasi ma le polokalame o taumafa a le lalolagi, ua manino e 97 loli ua gaoia, fai mai ua faamalosia aveloli e la’u ese uta sa iai i luga a o faasiilima i latou.

Ua iai foi le augalulue fesoasoani poo aid workers ua faamanu’alia ai ma taavale ua matuā faaleagaina.

E lē o iloa poo ai tonu le augaoi ae ua tuua’ia le faaletonu o le tulafono ma le nofo lelei aemaise leoleo Isaraelu ma le siomaga ua iai nei Gaza.

Ua faailoa foi e le CNN o le faafitauli lava lea ua feagai nei ma loli ia e aga atu mo Gaza ua mātele ina taofia i nofoaga e taofia ane ai ae mulimuli ane ua gaoia.

E le’i mamao atu ona faasā mai e Isaraelu le toe oo ane o le kulupu lea a Malo Aufaatasi e patino ia Palesitina ma o le tula’i mai o lea faaletonu ua atili faaopoopo ai mafatiaga i tagata i Gaza o lea sa talitali mai i le taunuu atu o le uta o taumafa ae o lea ua gaoia ma o loo su’e pea poo ai ua faatino lea gaioiga lē alofa.

Puna o Faamatalaga: https://edition.cnn.com/2024/11/18/middleeast/aid-trucks-looted-gaza-unrwa-intl-latam/index.html