O le Matāgaluega o A’oga ma Aganuu e pito to’atele faia’oga o le a avea ma leoleo fesoasoani i le taimi atoa o le fono a Malo o le Taupulega.
Ua faailoa e le Ofisa Sili o le pulega o lea matāgaluega tele a le Malo, i le polokalame o le Faailo Ao e 300 faia’oga o loo galulue i le matāgaluega ua mae’a ona faatauto e galulue i le matāgaluega o leoleo, falepuipui ma le fuata’ina e avea ma auxiliary members poo leoleo fesoasoani.
O i latou uma ia ua mae’a ona auai i a’oa’oga sa faamanino ai le faatinoga o le latou tautua.
O se faiga paaga masani a matāgaluega nei e lua e pei ona faailoa e le Ofisa Sili le afioga A’eau Chris Hazelman, auā o faia’oga foi sa mana’omia e le matāgaluega o leoleo i le taligāmalo o taaloga a le Pasefika i le tausaga e 2007 ma le 2019, faapea le taligāmalo i le fono a malo laiti le SIDS i le tausaga e 2014.
E tolu vaiaso o le a tuua ai a’oga ma e fetaui lelei ma le ofoina atu o le tautua a faia’oga o a’oga a le malo i le galuega a Malu o le Malo auā le fono a ta’ita’i o malo e 56, o sui o Malo o le Taupulega.
