E atoa le aso ananafi, alu atu ai ma le po anapo o finau pea leoleo ma le tamā na ia taofia faamalosi nisi o tagata i totonu o se fale i Nelson.
Mai le te’a o le 10 i le taeao ananafi, faato’ā maua se to’a i le lata i le 2 i le vaveao nei ma i lipoti a leoleo o lea ua taofia i lalo i lo latou vaavaaiga le tamā 56 tausaga le matua, tālia lona tulai i luma o le faamasinoga i le asō.
O le fale i Motueka St lea o loo lipotia, sa iai tagata to’afā i totonu, ma o le umi e 15 itula ma le ‘afa o le taimi lea na faatauanau ai e leoleo le tamā.
O tagata e to’afā nei na auaua’i le faamatuuina mai i fafo ma totoe ai na o lē ua molia ma le tagata e to’atasi.
O le faafetai, e faavaivai ane lea tamā i le vaveao nei e leai se soifua na aafia pe na faamanu’alia ai, e oo lava foi i le tagata e to’atasi na totoe i totonu o le fale.
O le mataupu lava foi lenei na tapunia ai aoga o loo lata ane faapea le falema’i i Nelson, ae mo leoleo ua faamaonia mai e le sui o le ofisa o lea na toe valaau isi leoleo faaopoopo mai Ueligitone ma Canterbury ona o lea mataupu.
Puna o Faamatalaga: https://www.nzherald.co.nz/nz/nelson-hostage-incident-resolved-man-facing-kidnapping-charge/RABM53DXNRCLXI5WXGYTWK54Z4/
