O se faanoanoaga le sau ai i tua o le tala i le tuumalo o le afioga i le tamaitai faiaoga, poo le tina ia Melegalenuu Ah Sam, o lē ua telē lona sao i le itu tau aoaoga i le gagana i Niu Sila nei. 

O le afioga ia Melegalenuu ua silia ma le 40 tausaga o galue o se faiaoga i totonu o Aukilani i Niu Sila, ma na amata mai lana tautua faafaiaoga i le Kolisi o Otāhuhu, ae o le tausaga e 1990 na see atu ai ma galue faafaiaoga i le Kolisi o Magele. 

Na avea Melegalenuu ma sui pule o le Kolisi a Magele, ae tuumalo nei le tamaitai faiaoga o loo ia tauaveina tofiga o le pule sili o le kolisi a o avanoa ai lea tofiga. 

I nisi o itu o le talaaga o galuega a le afioga ia Melegalenuu, o ia na faavaea le aotauina o le Gagana Samoa i le Kolisi o Magele, ma o i na agai ai loa le tele o sui e faatino le aotauina o isi gagana Pasefika e pei ona iai le Atu Kuki, Maori ma le gagana Tonga, ma o lea lava na faavae ai se vaega na faamalumalu iai itu tau i gagana Maori ma le Pasefika (Languages ‘L Block’) 

Ua faamauina foi le sao tāua o lenei tina i Niu Sila ma ana galuega lelei mo tagata Pasefika i Niu Sila e ala i aoaoga o le gagana, o lea i le tausaga e 2022, na amanaia ai Melegalenuu Ah Sam e le Kovana Sili o Niu Sila, Cindy Kiro, i se faailoga taualoa ua ta’ua o le Member of New Zealand Order of Merit (MNZM). 

O se tasi o sui faavae o le Fotu o le Malama, le Asosi o Faiaoga o le Gagana Samoa ma le Aganuu i kolisi ma aoaoga faaiunivesite. 

E maitauina foi, o ia o se sui e taulamua mo le Komiti e faatautaia fuafuaga ma polokalame o le Faaaliga Aganuu a Aoga (ASB Polyfest). 

O se sui ma o le Teuoloa a le EFKS New Zealand New Vision Church. 

Na avea foi lenei tina o se tasi o sui o loo taulamua i polokalame a faalapotopotoga a le FAGASA ma le SAASIA. 

Tau ina faamaise le Atua i le aiga faanoanoa ona o le motusia ai o le mafutaga ma le tina, le afioga i le tamaitai faiaoga ia Melegalenuu Ah Sam.