Ua valaau le Palemia o Tonga ma o le ta’ita’ifono foi o le Forum, Hu’akavameliku Siaosi Sovaleni, mo le lagolago faavaomalo i le Pacific Resilience Facility le PRF a o faia se sauniga e faatatau i le mataupu lea i le fonotaga lona 79 a Malo Aufaatasi le United Nations General Assembly.

O le PRF ua fuafua e mafai ona ausia ai se vaegatupe e 500 miliona Amerika a o lei oo i le faai’uga o le 2025 e lagolago ai i atunuu o le Pasefika o loo feagai ma aafiaga o suiga o le tau.

O se fofō lea a le Pasefika i lu’itau o loo aafia ai le lalolagi ona o le tau.

Ua faaāta e Sovaleni le PRF o se tali sa’o aga’i i faafaigata o feagai ma tamaoaiga faavaomalo lea e aupito aafia ai komiuniti a le Pasefika.

Ua ia una’ia le komiuniti faavaomalo ina ia amana’ia le agavaa o lea faiga ina ia faatino ai suiga lelei i nisi vaega o le Pasefika e aupito i aafia i suiga o le tau.